Эцэг эхчүүд мэдээд хэрэгжүүлвэл зохих зүйлс

 

      Хүүхдээ сайн үйл хийх, өгсөн үүрэг даалгаврыг цаг тухайд нь биелүүлэх гэх мэт эерэг үйлдэл хийснийх нь төлөө үргэлж урамшуулж, магтаж байх хэрэгтэй. Энэ нь хүүхдийн өөрийгөө үнэлэх үнэлэмжийн баталгаа болж өгөөд зогсохгүй цаашид урам зоригтой аливаа зүйлийг хийх эрч хүч авах, ирээдүйгээ сайн сайхнаар төсөөлөхөд нь тус болдог.

- Жижиг сажиг зүйлээс эхлээд хүүхэд өөрөө хийж чадах, энгийн зүйлд ч гэсэн байнга оролцож, заах хэрэггүй. Аяндаа хүүхэд зөн совингоороо өөрийн ухаанаар хийж л таарна шүү дээ. Хэрэв та үргэлж бүх зүйлд нь гар бие оролцох аваас хүүхэд том болсон хойноо ч тэр ямар нэгэн асуудалд шийдвэр гаргахдаа үргэлж хэн нэгний заавар зөвлөгөөг авч улмаар өөрийн гэсэн үзэл бодолгүй болж төлөвшихөд хүргэдэг.

- Хүүхдийг багаас нь өөртөө итгэлтэйгээр бусдын өмнө “үгүй” гэж хэлж чаддаг болоход нь сургах хэрэгтэй. Тухайлбал: өөрт нь таалагдахгүй байгаа, хийхийг хүсэхгүй байгаа зүйл хийгээд аливаа нэгэн эрсдэлтэй алхам хийхээс татгалзах үедээ “үгүй” гэж хэлдэг байх. Энэ нь өөртөө итгэлтэй занг бий болгож төлөвшүүлэхэд бас нэг алхам болж өгдөг.

- Бага наснаас нь хүүхдийг бусдын өмнө өөрийгөө чөлөөтэй илэрхийлж чаддаг байх, эелдэг найрсаг харьцааг эрхэмлэх байдалд сургах хэрэгтэй.

- Хамгийн наад захын зүйл болох мэндлэх, баярлаж талархсанаа илэрхийлэх гэх мэтийн харилцааны зүйлд сургах нь зүйтэй.

- Хэзээ ч бусдын өмнө хүүхдийг бүү шүүмжилж бай. Энэ нь хүүхдийн сэтгэл зүйд сөргөөр нөлөөлдөг. Учир нь эцэг эхдээ гомдох ч юм уу аль эсвэл зөрүүд занг нь хөдөлгөж улмаар ямар ч шүүмжлэлийг эерэг бус талаас нь хүлээж авахад хүргэдэг.

- Түүнчлэн бусад хүүхдүүдтэй харьцуулж загнахгүй байх. Энэ нь эцэстээ хүүхдэд атаархуу занг бий болгоод зогсохгүй өөрт нь хайргүй юм байна хэмээн бодох болно.